كرة القدم التونسية فقيرة بدئا بعقلية حكامها

محبيتش نبدى نكتب في هذي المدونة بموضوع يخص الكورة إلا أني مانجمتش نستنى أكثر
من هكا و إلي باش يفشلي غلي هي الكتابة ، هذا بعد ماإستعملت وسيلة أخرى و مانجمتش تناحيلي غشي. البارح هبطت شيشة تفاح في المقهى بعد 6 أشهر من الإنقطاع عن الجبدان و الولع و الجباد ( شديت في الدخان مسيبتش ) و مع ذلك ما نجمتش ننسى إلي صار أمس في المنزه في مباراة النادي الصفاقسي و النادي الإفريقي
أنا ماننكرش إلي أنا محب للنادي الصفاقسي إلا أني مانيش مالموضة الجديدة إلي تختزل الوطنية و القومية في نادي كرة القدم و مستعد للحرب
من أجله ، أنا مشجع ندخل لثلث مباريات فريقي على الأقل ساعات نكندر باش نعمل جو و نشجع في نفس الأونة، نحب التكتيك و النقد الكروي البناء
ونحب نعمل تشكيلة فريقي و نقارنها بتشكيلة المدرب بعد المباراة
هل هي تصلح و لا ؟؟؟


أمس تأكدت إلي الكرة التونسية ماشية في هاوية لعدة عوامل أهمها هي عقلية الحكام إلي تأدي لعدة مشاكل كيما المناوشات بين اللاعبين و هيجان الجماهير و تطفل المسؤلين المستكرشين
الكل يعلم أن النادي الإفريقي فاز 1 _0 في الدقيقة 92 و ألي تفرج على المباراة شاف الظلم ألي وقع على
CSS
قالولي برشة ناس كليبستيا يزي مالبكاء راكم عندكم 31 سنة مربحتناش في المنزه
تي كيفاش تحبونا نربحو في المنزه بثلاثة بينلتيات عيني عينك زوز منها تعيط " يا حكم اجا زفرلي !" تيكفاش تحبنا نربحو و الحكم يعطي ورقة صفراء ليلي يرد الفعل و إلي بادر متعتهوش ( الراجل شورتو قريب باش يطيح ناقص كان يقلو أهو لون تباني اجا زفرلي مخالفة )
مخالفات وهمية للنادي الإفريقي ، تقطيع اللعب ، إستفزازي

نحب نسال سؤال للحكم الفاضل الحرزي
كان جات ضربة جزاء لإفريقي في الدقيقة 95 تزفرها و لا ؟؟ بالطبع
نعم
أما 3 بينلتيات تعيط ياما إجريلي لا بالطبع
كيفاش يزفر ضربة من الدقيقة 80 ل + في ألمنزه ؟ تحب الجمهور يهبط لستاد

نصيحة للحرزي كون راجل و مبدئي و ماتخافش هكا إلي باش يوصلك للعالمية مش تبندير ل
CA و EST

يأخي كولينا زفر للاتسيو روما في نهائي الكأس في دقيقة 94 ضد يوفي في تورينو بذات !!!!!!!!!!!!!!!!!!!!!!!
و إنتي على خاطر 35 ألف كلبستي مرعوب

و تحبونا نربحو في المنزه !!!!!!؟؟ pauvre football tunisien




و أخيراً أنا مانيش باش نحمل المسؤولية كاملة على التحكيم أنا نحمل المدرب زادة و خاصةً في التغيرات ألي كان يرجو منها باش يدعم التعادل و زيد من فرص إقتناص فوز عن طريق إخراج مرابط ( أحسن لاعب في المباراة ) و إدخال كمال زعيم. رغم ذلك أنا نحترم ونحب المدرب الجزائري جودي في تفانيه في التدريب و في انضباطه و الكاريزما متاعو و أنا متأكد إلي أخطاء مباراة المنزه باش يستفيد منها في المستقبل