إلي حتني نعمل مدونة

إلي حطني نعمل مدونة بكل صراحة هو أني حسيت إلي أنا وليت ناضج نقدر باش نكتب و نعطي رايي في أغلب المسائل إلي تخص تونس خاصةً و العالم العربي و الأممية بشكل عام ( فكر ، فلسفة ، سياسة ، إقتصاد ، مجتمع ، ثقافة ، موسيقى ، كورة ، حب ..... )
إلي حطني نعمل مدونة هو إني سئمت ملفيسبوك و من النقاشات 90 % منها تافهة و ماعندها ماتوصل في الأخر و تزيد توتر العبد و أكثر حاجة هي وقتا الناس تفهمك بالغالط و هذي عانيت منها و أنا نحمل المسؤولية في مقام أول سيستام الفيسبوك و ثانياً عقلية العباد إلي تناقش عالشكل و تنسى المضمون و نيتها العدائية إلي تسبق الشر قبل الخير و هذا شي طبيعي جدا في ضل الأوضاع إلي نعيشوها اليوم
السبب الثالث إلي حطني نعمل مدونة هو العلم بما يمثله التدوين من أهمية داخل الحركة الفكرية الإفتراضية التي يصل اشعاعها و تأثيرها حتى على الحياة العامة
و السبب الأخير و هو سبب شخصي هو أني أؤمن بالتقدمية كخيار وحيد لتحرر الشعوب و أريد التقدم و ذلك بالتفاعل و الإختلاف مع الأخر من أجل حياة تعددية من أجل تونس أخرى تقدمية ممكنة