المشهد السياسي في رمضان بعنوان حومتي مع بن علي ؟؟؟

إنقطعت عن الكتابة في هذي المدونة ( أطال البلوغر في عمرها) إلي بصراحة بديت نفد منها و الحق يقال كل مالإنتخابات تقرب المواطن يفدّ من هالدنيا , تجيه حالة إكتئاب يقعد يشوف في الجزيرة كيفاش في غانا و بوركينا فاسو إتكون فيها1 بالمائة فارق بين زوز مترشحين ؟؟؟ هذا في بلدان العالم الثالث في التصنيف الثالث و الرابع متاعو؟؟
بديت نفد يا جماعة مش من هذا أكهاو أمّا أنا مواطن عادي بديت نتفلق من حاجة أخرى و إليها

العالم إلي داير بيا مع بن علي زعيم قبيلة التجمع

كي نقلكم متصدقوش و ين مانمشي في هذي البلاد لازم نتكرز نخرج باش ناخذ تكسي نقاه مزين بالبنفسجي و مع الكوميسار الكبير
مشيت هزيت صاحبي لمحطة القطار كيفكيف كرهبة مزينة و محرقصة ( و الحق يقال برجولية خصارتها هكي الكرهبة ياسر سبور مسختها
تصاور العزوز )

مشيت لسوسة هاللايمات أول مهبطت من القلعة الصغرى نقى معمل قدامي عامل بلاكة الفوق أكبر حتى من بلاكتوا كاتب عليها " معمل الأجر بالقلعة مع بن علي 2009 " ؟؟؟ حتى معمل الأجر معاه يا خويا مزهروا بصحتو برجولية ههه
يقول القايل حكاية فارغة تاكسيات و كراهب و معامل نقلوا أنا إلي كرزني بالحق هو إنو" حومتي مع بن علي" ؟؟؟؟؟؟
أيه يا جماعة حومتي مع بن علي شلقت بها عندي يومين وقتى شفت شباب من أقذر شباب الحومة هكومىة إلي يبيعوا روحهم على خاطر 10 دينار يعملوا في بندرولات و أعلام في كوخ الكلب ( سامحوني الشعبة نقصد ) أأأه ياناس راني موجوع الناس يحبوني يردوني مع بن علي حتى حومتي

و مش كان حومتي برك شد عندكم

ــ قهوة الذبان و جميع أحياء العاصمة الداخلية المطلة عل الغرب المحايد مع بن علي

ــ حي الدرابك و الحفارة و الكزمات مع بن علي
ــ حي لافيات و العوايات و السيجومي و حي الكامندية مع بن علي
ـ حومة السمرة و حي الفيتنام مع بن علي
ــ شط مريم و برج خديجة و بسين علياء مع بن علي

و هي وقفت في الشارع برك لااا
حتة في الدار أبدى بالتلفزة و الراديو و الأهم في رمضان هذا شهر البيضان و تنتين الكشخة الطاولة متى الماكلة و ما أدراك مى معنى الماكلة في رمضان واحد يبدى نهار كان الدخان و الماء ( ماهو من كثرة الحريات في تونس حتى في رمضان واحد معندوش الحق ياكل ) نقعد نستنا بفارغ الصبر وقت الإفطار باش واحد ياكل حاجة بنبينة من عند امي الحنينة
نجي باش ناكل الشربة نسمع حس يقلي " أنا الشربة مع بن علي 2009 " ؟؟؟؟؟؟؟؟
ــ الزلابية و المخارق مع بن علي بعد إعلان باجة البيعة
ــ الطاجين مع بن علي و البريك في حيرة
ــ المقرونة مع بن علي و ذلك بعد تزكية برلسكوني
ــ اللوبية و المحمص و المسفوف و الكسكسي و الشكشوكة
حسيلو كل الماكلة مع بن علي
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

لكن الغريب فما ناس مش مع بن علي و قبيلتو
اولا السلتيا و ما أدراك ما السلتيا ترشح نجيب الشابي و السبب أن السلتيا محرمة في رمضان و لا يمكن إقتنائها رغم أن القانون الأصلي لا يمنع شربها و بمأن الشابي و هو على الأقل شخصية مناضلة لا يستهان بها و منعه القانون الإستثنائي من الترشح أعلنت السلتيا ترشيح الشابي ههه

السلتيا مع الشابي

بما أن هلال رمضان زكا بن علي فالنجمة رشحت بن إبراهيم ( الند بالند ) ههه

نجمة رمضان مع بن إبراهيم

و برجولية نحس إلي هذي أخيب مقال عملتو في حياتي لأني معاش فيا قبيلة بني تجمع باش يغلبوا عليا

أكبر تفشليم صار في حياة التوانسة

عدو التقدم العنكبوتي

على الأقل هذا هو العدو العنكبوتي المعترف به من قبل التوانسة الكل إلي يستعملوا الإنترنات من المثقف للبوهالي و إلي يقولوا لا سامحني فيهم هذومة ناس ماتحشمش و ولاد [ ق ..ة ] و مأالهم إلى مزبلة التاريخ في الأخر
هذا العدو أثار خلاف حول كيفية مواجهته و إنقسموا التوانسة إلى قطبين
+ القطب الأول : هو إلي كان أكثر شعبية و فعالية و قاده جملة من المثقفين و السياسيين أبرزهم الرفيق المدون عياش مالمرسى هذا القطب قام بحملة شرسة على عمار و شلتوا في المدونات و الفايسبوك و تويتر ...... الخ
+ القطب الثاني : هو إلي كان أكثر سذاجة و تفاهة و قادوه مجموعة من التجمعيين و مواطنين بوهاليين ما ينتقوا مالدنيا شيء كان إستعمال الفايسبوك هذا القطب قام بحملة يدعو فيها رئيس شبه الدولة بفتح موقعين فقط ؟؟؟؟ يوتيب و داليموشين و معليلين تحركهم بمافعله الرئيس حين أزال الحجب عن الفايسبوك
شوف عاد اااااااااااا باللاهي فما دولة حاجبة الفايسبوك هيا ؟؟؟؟ عاد كان تولي تونس الوحيدة إألي تحجب الفايسبوك تولي بورجولية فضيحة بجلاجل

بالنسبة ليلي أنا قبل عاميين كنت نعتقد كتخرجلي هكي " نوت فوند "راهوا هكا مالموقع و بعد ما أكتشفت الحقيقة بالصدفة وقتا كنت نعمل بحث حول الأنترنات و الملتمديا دغششت برشا لأني ملي أنا صغير ما نحبش واحد يقصي غيروا مل الكلام و يقعد يلقن فيه و يغسلوا دماغوا كالمعلم و الأب إلي يهز ولدو بصيف للجامع و يقلو هذا حرام و هكا حرام.
برشا صحابي قالولي ميسالش حكاية فارغة خوذ لوجيسيال و كي يتحرقلك هبط لوجسيال أخر و ديما يمشي جربتها لحكاية جمعة و ممشاتش في مخي
تي علاش نعمل في لوجسيال و أنا من حقي ندخل اليوتيب مثلا من غيروا كيف البشر في العالم علاه ؟؟؟؟ أحنا عبيد, مواطنين درجة رابعة,رعايا ؟؟؟؟؟
لين شفت الحملة متى

free from 404

و قتها عرفت إلي أقوى سلاح باش تفتك مكسب في الدنيا هذي و باش تحقق التقدم لناس الكل هو بالعزيمة و الإحتجاج الجماعي المنظم و بالفعل مش بالكلام
المرة هذي إستقطبت أكثر من 9000 تونسي المرجايا تستقطب أكثر من 50000 بالعزيمة و بالتنظيم الجيد المسبق و باش خشم عمار يتيح في القاعة

الإعجاز العلمي أم العجز العلمي

ما يحيّرني ويقدح حرائق الأسئلة في ذهني هو حجم الأموال التي تهدر للترويج لما يسمّى بالإعجاز العلمي، بين تأليف ونشر وإعلام ومراكز "بحث" بين مزابل علماء الغرب ووو... مبالغ خياليّة صدّقوني، فلكيّة...
قلت ما يحيّرني هو لماذا تصرف هذه المبالغ الأسطورية على مجموعة من ملتحي العقول ليتصيّدوا كلّ بحث علمي جادّ أو غير جادّ، نظريّ أو تطبيقيّ، يبتترونه من سياقه، ويخضعونه لسرير التطويع القروسطي فيبتروا منه ما زاد ويمطّطوا منه ما قلص، حتى يواتي نصّا يتأوّلونه من القرآن ويصرخوا هاتفين بالفتح المبين: أنظروا لقد جاء هذا في القرآن منذ أكثر من 14 قرنا.
تصرف هذه المبالغ وتهدر هذه الأنهار من البترودولارات على إثباتات متعسّفة أحيانا وربما مطابقة أحيانا أخرى لنصّ مبتور من سياقه، فما كان أجدى أن تصرف على البحث العلمي نفسه؟
يحاولون أن يثبتوا لنا أننا لسنا بحاجة إلى العلم فلدينا العلم كله بين أيدينا وما فرّطنا في الكتاب من شيء، فدعوني أتسائل: لماذا هذا الإصرار على تجذيرنا في ملكوت الجهل وعزلنا عن التطوّر؟؟ ومصلحة من يخدمون؟؟

أجنحة ماغون

أول فلقان التلفزة في رمضان " المسلسلات الكوميدية الخليجية "

كيجي رمضان نقولو تلفزة و مسلسلات تونسية , مصرية , سورية , خليجية بإختلاف مواضيعها دينية , كوميدية, إجتماعية , راقية من الناحية الثقافية ( السورية خاصة ) أو حتى تاريخية
و بالطبيعة الحال في كل حاجة في رمضان فمّا المفلق و المكرز أول فلقان تفرجت عليه في التلفزة هو الكوميديا الخليجية
إلي كلها تهريج و ماتضحكش لا تحمل أي قضية انني أرى البعض من الممثلين « يشحتف في روحو باش الناس تضحك »
كيما بينك وبينك التافه إلي موضوعو كامل يتمنيك عل منطقة العسارية في السعودية كان المساطة و فقر الفكرة تقعد تتفرج عليه حلقة كاملة ماتفهم حاجة منو و إش يحب يوصل

خليلو خليلو ؟؟؟؟؟ ملا فلقان !!!!

فما ناس يقولو طاش ماطاش عالأقل نجح و مازال يعرض لموسم 16 لكن هل هو ناجح فنيا ثم جماهيريا؟ على التوالي إذا أتينا لأحد أشهر المسلسلات الأجنبية (الأصدقاء) فسنجد أنه استمر لفترة عشرة مواسم، منذ عام 1994 إلى عام 2004، عشر سنين و هو يستقطب في الجماهير مش كان من أمريكا وحدها بل من أنحاء العالم. يجعلنا نتساءل ماالذي يجذبهم حقّاً لهذه المسلسلات؟ وماالذي يميّز مسلسلاتهم لتستمر بنجاح كل هذه السنين؟. بالتأكيد باب المقارنة هنا مغلق، ماتنجمش تقارن ما بين المسلسلات الخليجية ومسلسلاتهم.
لأن وضعنا مأساوي للغاية فيما يختص بعالم المسلسلات التلفزيونية أكانت من ضمن فئة الدراما التي تطلّ علينا بأعداد مهوّلة من الصفعات وشلالات مستمرة من الدموع التي لا تنتهي كل عام، أو الكوميديا التافهة التي لا يقبلها حتى الأطفال حين يشاهدونها و يحبوا يبدلوا القناة ساخرين بقولهم (هذا مسلسل متا مفرخ!). دون أن ننسى تلك المعضلة المسمّاة بالثلاثين حلقة! والتي ينتج عنها “تمطيط” الأحداث.

هل أنت تافع أيها المشاهد الخليجي و العربي ؟؟؟؟

الجنة ب 500 مليم إنشرها و لك الأجر

أمس في القهوة نلعب في طرح رامي مع صحابي و في جرية صاحبي قاعد يمشكي في الكارطة و كبش غادي مشيت قتلوا في سخرية " الكارطة تمشكات إنشرها و لك الأجر

صاحبي :ـ و السبعة الحية وين نحتها ؟؟
أنا :ــ أنشرها ولك الجنة إن كانت سبعة حية
صاحبي :ــ وإن كانت كوّال سباطة جهنم وبئس المصير؟
أنا :ــ لا تحال على لجنة نظام متكونة من عزرائيل و جبريل و معشر من الملائكة
و يوكل لك إبليس كمحامي
حسيلو دارت القعدة ضحك حتا لين واحد ولا يبكي و أحنا بالحرام نبكيوا في داخلنا عل الحالة إلي نشوفوا فيها في الحياة الواقعية و الإفتراضية

جاووووو عندي سبعة حية في كفي ههههه

يقول الشاعر الذي يتبعه الغاوون طبعا:
طبع الناشر على شفتيها قبلة
والأخرى تحت الطبع...
وللنشر أبقاك الله معاني أهمها ما يمارسه بعض الآكلين من موائد الأيتام (المواطن التونسي الفاقد للأب الراعي والذي استولى على ميراث حداثته اللئام) يعني نقصد بيه

م المناشير (...موش المناشير الورقية ) اللي طالعة تاكل هابطة تاكل، وتبيعلك الجنة بالربا الفاحش

هنا السؤال يطرح نفسو" بقداش الجنة تاو ؟؟؟

حسب تقديرات المتسولين المحترفين بخمسائة مليم
كان تدفع أقل يدعي عليك بالشر وترصّالك في جهنم وبئس المصير

مكرّز انا.. حتى ينتهي تكريز قبيلة بني تجمع, أصحاب الهراوات و الخوانجية و المعقدين أو انتهي انا

إيجا و صوت باش نعرفو قداش من مدون صايم و قداش من مدون فاطر ههه

حط عنيك عاليمين وتو تشوف التصويت و صوت

أخر نكتة لرجعيين الظلاميين ههههه

إندلع جدل حاد في تونس حول دعوة لإعادة إجازة تعدد الزوجات كحل إسلامي للمشاكل الاجتماعية مثل العلاقات خارج نطاق الزواج والعنوسة التعيسة.

تؤيد دلندة صحبي، التي وجهت نداءها يوم الثلاثاء 11 غشت خلال ندوة حول مكاسب المرأة التونسية تعدد الزوجات بسبب "ارتفاع عدد العوانس وتزايد الانحلال الأخلاقي والليبرالية المفرطة التي تسمح بإقامة علاقات خارج الزواج".

وقالت صبحي وهي متزوجة "علينا إجازة تعدد الزوجات لأننا لسنا أفضل حالا من بقية الدول العربية. والأكثر من هذا كله فإن الدين الإسلامي أجاز ذلك ولنا في الرسول محمد صلى الله عليه وسلم أسوة في ذلك".

ويذكر أن تونس حظرت تعدد الزوجات بموجب مجلة الأحوال الشخصية . ففي عام 1957 أصبح تعدد الزوجات جريمة يخضع لعقوبات سجن قد تصل إلى ستة أشهر

نسرين المشاركة في الندوة عارضت الفكرة مؤكدة بشيء من التهكم "وهل الرجل في تونس قادر على إيفاء واجباته تجاه امراة واحدة حتى يتزوج بثانية وثالثة؟"

وبالنسبة لخديجة، امرأة عازبة في الخمسينيات من عمرها، فهي تفضل العنوسة وقالت "أنا أفضل أن أكون عزباء طوال حياتي على أن أكون زوجة ثانية".

من جهته قال الإعلامي مختار التليلي الذي شارك في الندوة أن رفض تعدد الزوجات في تونس كان ساري المفعول حتى قبل صدور مجلة الأحوال الشخصية. لكن مع الصحوة الدينية القوية في تونس طُرح الأمر للجدل من جديد.

وقال التليلي "تتحول المرأة كأداة لمعركة ظاهرها ديني وباطنها سياسي"، مضيفا أن "الكثير من التونسيين تستهويهم هذه الفكرة لأسباب غريزية وحيوانية ولكنهم لا يجرؤون على الاصداع بها"

وفي خارج المنتدى، اختلفت الاراء في الشارع بين مناصر للفكرة ورافض لها بشكل قطعي

رمزي البدوي قال "في آخر الأمر فإن تعدد الزوجات جائز شرعا وحلال ومشروع ولكن بشرط الاستطاعة والعدل."

وقال "لكن بسبب وجود عقوبة تعدد الزوجات، فإن الوضع يصبح أكثر سوءا وتعقيدا" وأضاف "هنالك حالات انسانية تفرض على الزوج أن يتزوج بامراة أخرى قصد الانجاب مثلا نتيجة عقم زوجته الأولى"

ويختم البدوي أنه "حرام شرعا وغير عادل أن يطلق ويهمل الزوجة الأولى بعد عشرة عمر طويلة حتى يتزوج بثانية"

سميرة اللواتي، وهي في الثلاثينات من عمرها، هاجمت مجلة الأحوال الشخصية برمتها وقالت إنها لم تكن رغبة المراة التونسية بل على العكس كانت رغبة بورقيبة الرئيس السابق

هذوما الناس ميحبوش يسبونا نعيشوا لاباس بعاد عن خزعبلات القرن السادس ميلادي ميزيديش أحنا نعانيو من دكتاتورية بني تجمع يحبو يمرضونا الزوز , ناس فاضيا شغل .

أنا مانيش باش ندورها تقطيع و تريش في المدونة أما عالأقل نعطي رأيي في الحكايا المرزبا هذي إلي مانعرفش منين طلعلتنا. طبعا الدعوة إلى تعدد الزوجات في تونس دعوة فجة وأسبابها متهافتة ودليل على الجهل بما يجري في الدول التي تبيح التعدد،هذا التعدد لم يحل مشكلة العنوسة في البلدان التي تعمل به ونسبب الفتيات العانسات منتشرة فيها بلغت نسبة36 بالمائة زيد على ذلك ينجر منو أنواع من الزواج الرجعي و التافه مثل زواج المسيار وزواج المصياف وزواج الفرند وزواج الدم الخخخ من الزيجات الفاسدة التي تعتبر فيها المرأة متاعا للمتعة يطيشها الراجل وقت تنتهي رغبته فيها، كما ان الرجال الذيت يمارسون التعدد يهينون المرأة, وقت إلي تبلغ الثلاثين فأكثر يعتبرها مسنة ويتزوج بأخرى وبأخرى ثم يسارع إلى الطلاق إذا جمع الأربع نساء ويجدد زواجا آخر ويقضى عمره في تلبية رغباته الجنسية ولايجد وقتا للعلم ولاللعمل, هذا القانون إلي يحبو تطبقوه إستنادا الى الشريعة الاسلامية التي شرعت قبل قرابة 1400 سنة وكانت معادية للمرأة حتى وقت صدورها ولان هذا القانون يرسخ كل اشكال العبودية للمرأة ويعطي الرجل كامل الحرية والتصرف في تعامله مع المرأة ويشرع له الحق في الزواج باكثر من امرأة بالاضافة الى مسألة الارث الخخ من الشهادة في المحكمة وعدم قدرتها على القرار حول تنقلها وسفرها و البقية تأتي ......

وجود هكذا قانون سيجلب المآسي للملايين من النساء بالاضافة الى ازدياد معاناة النساء داخل عوائلهن وسيؤدي الى تصاعد العنف المنزلي ضد المرأة وزيادة حالات الزواج المبكر رغما عن ارادة وميل الفتاة واختيارها بالاضافة الى حالات بيع وشراء المرأة من خلال عقود الزواج التي يقوم بها الاب والاخ الكبير ويقبض المال من العريس الذي يصبح درجة غناه وكمية المال الذي يقدمه هو المعيار الوحيد لقبول عملية البيع والشراء تلك والمسماة الزواج. ان كل الاسباب التي ذكرت واسباب اخرى متعددة كلها تؤدي الى اتجاه ومسار واحد وهو تحقير وانزال موقعية المرأة في المجتمع الى الحضيض وجعلها انسان بلا حقوق وتسليط الارادة الرجولية – الذكورية – ضدها في كل ما تقوم به وبالتالي تحويلها فعليا الى حالة العبودية.

هذا هو إلي تحبوا عليه ؟؟؟؟؟؟ شنو فيها واحد يعمل علاقة جنسية مع فتاة يحبو بعضهم حرية جنسية يعني و لا تحبوا إهانة المرأة خير ؟؟؟